O loo faaauau nei su’esu’ega a leoleo i le faalavelave sa tula’i mai i le faai’uga o le vaiaso i Sini na maua ai tino maliliu o se tamā ma sona afafine e 6 tausaga le matua.
Ua faailoa i lipoti a le Alaata 9 a Ausetalia o loo faatalia le i’uga o le su’esu’ega poo se matāupu e aofia ai le fasioti tagata pule i le ola.
Fai mai na valaau ane le fesoasoani faavavave i le nofoaga i Concord ina ua maua lipoti o se alii i le vaitafe i lea faaitu, e maua atu ua maliu ae maua ai mulimuli ane le tinomaliu o le teineitiiti e 6 tausaga le matua mai lea lava faaitu.
O loo feta’ua’ina e foliga o se faalavelave na fuafuaina ma o loo iai foi lipoti ua feta’ua’ina ai sa faailoa e lē ua maliu i nisi o ana uo o loo fuafua e na te faaoo le oti ia i la’ua uma ma lona afafine.
O loo fesoasoani nei le tinā o le teineitiiti i le su’esu’ega ae ua faailoa i lipoti le tulaga mafatia o loo iai ma o loo faia pea su’esu’ega.
Puna o Faamatalaga: https://www.nine.com.au/australia-news/nsw/sydney-father-allegedly-plotted-daughter-s-death-before-parramatta-river-tragedy-20260614-p606ns.html
