Ua faailoa i le tala faaopoopo muamua o le tupe lea ua taoto nei i le laulau a fono a le Palemene, ae faatoa soalaupule e le fono aoao i le masina o Ianuari o lena tausaga o muamua nei, le faaauau pea o le tulaga lelei o le tamaoaiga o le atunuu, i le tuanai o tausaga e tolu na matuā tu ai i le faletonu ona o aafiaga i le pepesi o le faamai Koviti-19.

Faaalia e le Minisita o Tupe i lana folasaga i le Palemene, o le mae’a o le tausaga faaletupe mai le masina o Iulai o le tausaga 2022 e oo mai i le faaiuga o Iuni o le tausaga nei 2023 e tusa ma le 8 tesimale 0 pasene na siitia ai le tamaoaiga o Samoa i se aofaiga o tupe e tusa ma le 2 tesimale 55 piliona tala. 

“O lenei siitaga ua atagia ai le faatāuaina e le Malo o le toe faufauina o lona tamaoaiga, pe a fua atu i le tulaga maualalo na faamauina mo tausaga faaletupe e tolu ua tuanai atu, ma o lea ua toe faafoisia ai le tamaoaiga i se tulaga lelei i le taimi nei.

2. O aitalafu a le Malo sa faamauina i le $907.5 miliona, e tusa lea ma le 35.6 pasene o le tamaoaiga i le faaiuga o le tausaga faaletupe 2022/23.

O lenei faaitiitiga ia tatou nonogatupe, e afua mai i le leai o ni a tatou nonogatupe fou o faia aemaise ai le faaauau pea o le totogina o nei aitalafu.

3. O loo faatumauina foi le lelei, aemaise o le gafatia e le Malo o tupe totogi atu mo fefaatauaiga e pei ona faamauina ai le $1.14 piliona o tupe faaagaga mo fefaatauaiga i le kuata muamua o le tausaga faaletupe lenei, poo le faaiuga o Setema 2023, ma e tusa ma le 11.5 masina o oloa faatauina mai fafo. 

4. E 9.1 pasene sa faamauina ai le maualuga o le tau o le soifuaga mo le sefululua masina na faaiuina ia Setema 2023.

A faatusa i le sefululua masina na faaiuina ia Iuni 2023, e 2.9 pasene ua tuuitiitia ai pe a fua atu i le 12 pasene sa faamauina mo lea vaitaimi.

5. O a tatou Faiga Faavae Tautupe sa fesoasoani malosi i le unaia o le tamaoaiga e ala i nonogatupe mo pisinisi i Faletupe tuma’oti.

6. Ua siitia le numera faamauina o tagata faigaluegaina i le 6.2 pasene poo le 25,976 tagata faigaluega, e faatusa i le kuata o Setema o le tausaga ua mavae.

O le kuata lona fā foi lenei ua faamauina ai o loo tumau pea le faatupulaia o tagata faigaluega; i le mae’a ai o le sefululua kuata sa faaitiitiia ai lenei fuainumera talu mai Tesema 2019. 

7. O loo siitia pea le numera o tagata tafafao maimoa mai fafo e pei ona faamauina ai le 48,620 tagata faimalaga mai i totonu o le kuata na faamae’aina ia Setema 2023, e tusa lea ma le 233.5 pasene ua siitia ai pe a faatusa i le kuata lava lea o le tausaga faaletupe ua mavae.

Ua faamauina o Niu Sila ma Ausetalia o loo maualuga ai tagata faimalaga mai i le tatou atunuu, e lē gata o turisi tafafao, faapea o tatou tagatānuu o loo asiasi mai i aiga.

Ua faapea foi ona siitia maoae i le 230.3 pasene tupe maua mai pisinisi mo tagata tafafao maimoa mai fafo, ma faamauina ai le $159.36 miliona pe a faatusa atu i le kuata muamua o le tausaga ua mavae atu.

Outro : Se vaega o le saunoaga a le Minisita o Tupe afioga Lautimuia Uelese Vaai, i le tala faaopoopo o le tupe muamua, lea o le a iloilo e le komiti o tupe a le Palemene mo le 14 aso, ona lipoti atu ai lea i le fono aoao mo le talanoaina.