Ua liupotia mai nei o Amerika lea o le a vaavaaia le agai ese mai o vaega’au a Isaraelu mai le itu i saute o Lepanona ma e lē o toe mamao nai aso ona faataunuu lea o lea feutanaiga.
Faamauina i ripoti a le NZ Herald faamatalaga mai se sui o Amerika e faapea o loo fuafua e faia isi talanoaga fou i le va o Isaraelu ma Lepanona i le vaiaso fou.
Ua ta’ua o se vaega lea o le maliega na faatulaga i le aso 26 o Iuni o le tausaga nei ma ua fuafua ai o le a agai atu le miiliteri a Lepanona e faafoe itu ia e lua o loo iai nei fitafita a Isaraelu pe a mae’a ona agai ese. Ua faailoa la e le Amepasa o Amerika i Lepanona o Michael Issa ole a taunuu atu i Beirut ini nai aso o lumanai se aumalaga mai le militeri a Amerika e faamautu tulaga uma mo le faagaioia o mea i le laueleele.
Fai mai o lea maliega o loo teena e le Hezbollah ona e leai se aso faatulagaina e o ese mai ai Isaraelu ma ua mae’a faailoa foi e sui o Isaraelu, ole a tumau ai pea ana vaega’au i Lepanona pe afai e faaauau pea ona faaaupegaina vaega’au a le Hezbollah.
Puna o Faamatalaga: https://www.nzherald.co.nz/world/us-to-guide-israeli-withdrawal-from-lebanon-pilot-zones-and-lead-peace-talks/6JQDHXDMLNFMTEWPUY5NPDF23A/
