Ua faailoa lautele mai nei e le Matagaluega o le Punaoa Faalenatura ma le Siosiomaga o loo iai le Pulega o le Ofisa o le Vaaitau, le iai o Samoa ma isi atunuu o le Pasefika i tapenapenaga mo ni mala faalenatura e ono tulai mai, ona o suiga o le tau ua iai nei ua faaigoaina o le El Niño lea ua faasamoa o le Elenino.
Ua faailoa i se faasalalauga o uiga ia o le tau e ono faaitiitia ai le suātimu e pa’ū e fesootai i le matūtū o le eleele ona o ni la mala, ma aafia ai le tulaga i le suavai maua, ae e ono faatupulaia ai ma aafiaga o le atunuu i ni matagi afa mai le taimi nei agai atu i le faaiuga o le tausaga ma le amataga o le tausaga fou.
O faamaumauga ua faailoa e le Matagaluega o le Siosiomaga ma le Vaaitau o loo faamauina o le Elenino i le va o le tausaga 1997 ile 1998 na ogaoga aafiaga o le atunuu i le silia i le 3 masina o mago le laufanua i le malosi o mūgāla ma ua leai ni timu. Na tulai mai ai mu tetele i le togavao i Asau ma Aopo. O ia foi suiga o le tau i le tausaga e 2009 i le 2010 na faaitiitia ai foi timu na maua ma mafua ai ona ‘uti’uti le suavai maua ma faasoasoa ai le suavai. Sa iai foi aafiaga o Samoa i le Elenino i le tausaga e 2023 i le 2024 ae sa feololo aafiaga na tulai mai. O le faailoa ai o tapenapena i ni tulaga e tulai mai i ni mala faalenatura ona o le Elenino i lenei tausaga agai atu i le tausaga fou, ua aumai ai se fautuaga a le pulega o le suavai i le atunuu atoa, ina ia faaeteete le soona faaaoga o le suavai i manaoga masani e pei o le fufulu o taavale, ma ia faapale le suavai maua pe a oo ina pa’u ni timuga. O le taimi lelei foi lenei o le faatau o le tane vai aua aso e matutu ai le laueleele ile malosi oni mugala e ono tulai mai.
