O aafiaga o le faamai o loo pesia ai Samoa i lenei taimi o le tausaga, ua molimauina ua iai ma mafatiaga tau tamaoaiga ua fetaia’i ma nisi o aiga e sili ona lima vaivai ma aafia i tulaga mā’ale’ale o le soifuaga o aso uma.
O le silasila a le Malo e ala mai ile Matagaluega o Tina ma Tamaitai, Atina’e o Nuu ma Afio’aga ma Agafesoota’i (MWCSD) ia faatino se galuega fesoasoani ma faapena ona tapena ai ni ato ua iai fasimoli, o puni fofoga, o vai e faamamā ai lima poo aao mai siama, o faguvai ma pepa o faamatalaga mai le soifua maloloina faatatau i auala o puipuiga mai le koviti 19.
E 200 meaalofa fesoasoani na amata tufatufa i ia aiga i Upolu ma Savaii ile 2 vaiaso na talu ai nei ma na faaauau ile vaiaso na te’a nei. O fesoasoani mo le motu o Savaii na tuuina atu i faipule o itumalo faapalota ona oi latou o loo silafiaina lelei aiga lima vaivai e tatau ona tuuina iai le fesoasoani.
