O aso e lua mai le Aso Lulu i le Aso Tofi o le vaiaso na tea nei na faamauina ai e le matagaluega o le soifua maloloina le maliliu o nisi tagata e toatolu i le faama’i o le korona vairusi poo le Koviti-19 ma siitia ai i le to’a 19 i latou ua fano soifua ona o le faama’i. Na faamauina ai foi i ia aso e lua le aafia o tagata e 597 i le siama o le Koviti-19. Ae i lea aofaiga, o le 596 o tagata mai le lautele o le atunuu ma le toatasi o se tagata malaga mai fafo ma siitia ai i le 9,519 le lautele o tagata i Samoa ua maua i le faama’i.

O ē ua māliliu:

O se tamā 45 tausaga le matua, sa iai se isi ona gasegase na aafia ai, ae ua o faatasi ma āuga o le Koviti-19. E le’i faia sona tuipuipui.

O le isi o se tinā 77 le matua o le soifua, ua mae’a ona tuipuipui e lua, faatasi ai ma le tui faaopoopo (booster) ae sa iai lona ma’i tumau faatasi ai ma isi gasegase ua o faatasi ma āuga o le siama o le Koviti-19.

O le tasi o se tamā 85 tausaga, e le’i faia lava sona tuipuipui o le Koviti-19 ae iai fo’i isi gasegase sa aafia ai, faatasi ai ma le aafia i le siama o le faama’i.

E to’a sefulutasi tagata ua aafia i le siama o le faama’i o loo taofia i le nofoaga faapitoa i le maota gasegase i Motootua ae toatasi o loo taofia i le potu mo gasegase tigaina.

O faamaumauga ia talu mai le Aso Lulu ma le Aso Tofi ua mavae ae lei maua mai se lipoti o le Aso Faraile e oo mai i le Aso Sa ua tea atu nei. O lea foi lipoti na tuuina mai faalauaitele i le Aso Toonai e le o faailoaina ai ni faamaumauga o ni tagata faaopoopo ua aafia i le siama o le koviti i Savaii faapea motu o Manono ma Apolima.