O loo olioli mai falelalaga a komiti o tinā i Savaii mo le latou faalelegapepe ma faalauiloa a latou siapo i le Aso Faraile o lenei vaiaso, ae o le faalelegapepe ma le faalauiloaina o siapo a komiti a tinā i Upolu i le Aso Lulu o le vaiaso nei lava na molimauina ai le maoa’e o le tulaga ua ausia e matuau’u ma le auseepapa ia latou galuega o lenei tausaga.

O le falelalaga a le komiti o tinā ma tamaitai o le afio’aga o Mulifanua ua na maua le faailoga faapitoa ona ua na ausia le sefulu ma sili atu ie tosi tasi sa lalagaina ma faalauiloa i le faalelegapepe.

O le komiti foi lea ua maua e le matuau’u o loo faauluulu iai le faailoga faapitoa ona o le maopoopo o lana ta’ita’iga ua mafai ona ausia ai lea aofa’iga o ie tosi tasi.

O faailogatupe ua saunia e le malo ua maua ai e le tinā na mae’a lalaga a latou ie tosi tasi le $1,000 tala, ae o tinā ua mae’a le ie tosi lua e 800 tala.

Ua maua foi faailoga tupe a tinā ua latou mafai ona lalaga uma le ie tosi tolu.

O tinā matutua ua oo le matua o le soifua i le 70, 75, 76, ma le 79 sa maua foi o latou faailoga faapitoa ona ua mae’a foi ona lalaga a latou ie tosi tasi.

O le falelalaga a le komiti o tinā o le Laumua o Tumua mai Afega ua latou maua le faailoga faapitoa i le mafai lea ona latou gaosi siapo e 20 ma ua faameaalofa ai e le Malo e ala i le Matāgaluega o Tinā ma Tamaitai Atina’e o Afioaga ma Agafesoota’i le 300 tala i le siapo e tasi.

O le taumafaiga lenei a le malo ua leva tausaga o faatino i le faamoemoe autū ia faaolaola le maua pea o ia oloa ma measina a Samoa o galuega alofiaao o tinā ma tamaitai.

O le Tamaitai Palemia afioga Fiame Naomi Mataafa ma nisi o malo valaaulia sa latou molimauina le faalelegapepe faapea le Minisita o le matāgaluega o tinā ma tamaitai o loo feagai ma le polokalame o le ie Samoa.