I le 60 tausaga o faaaogā pea maota ma fale o loo faamautu ai le sui o le malo o Niu Sila ma ana tagata faigaluega i Letava i le agai lea i Vailima, o lea ua amatalia galuega o le fausia nisi fale fou mo le lotoā atoa o le a faaaogā ai fausaga o fale e fetaui ma suiga o le tau, ma o Samoa ua muamua faatino ai.
O le Komesina maualuga o Niu Sila i Samoa o Dr Trevor Matheson ma le Palemia o le tatou Malo, Afioga Fiame Naomi Mataafa na aofia ia i latou na suaina le eleele e faailoga ai le amatalia o lea galuega.
O le nofoaga o loo faamautu iai le sui o le Malo o Niu Sila ma nisi o lana augalulue mai fafo o se tasi o nofoaga pito leva i le atunuu, ae o lea faato’a faafou fale o le nofoaga atoa.
O le nofoaga foi lea e tapuvae tasi iai sauniga faalemalo a Niu Sila i Samoa e pei o aso faamanatu ma isi sauniga faalemalo, aemaise pe a afea lo tatou atunuu e faiga malaga o taitai o le Malo o Niu Sila.
