I le feiloa’iga a le tamaitai Palemia o Samoa Fiame Naomi Mataafa, le Sui Failautusi o le Va i Fafo Malo o Amerika ia Wendy Sherman ma le vasega o tusitala na faailoa ai e Wendy fuafuaga mo le toe faia o polokalame mo pisikoa mai Amerika e galulue ai i Samoa i se taimi o i luma.
Ta’ua e Wendy na ia faailoa i le Palemia o Samoa ua nofo tapena le Malo o Amerika i le toe foi atu ai ma le faaauauina o le galuega ofo fua poo peacecorp volunteers a Lea atunuu i totonu o Samoa.
I le silia i le 50 tausaga talu ona amata mai lenei faiga faapaaga i le va o malo e lua ua silia ma le to’a 2,000 pisikoa ua galulue ma nonofo i Samoa ma e talitonu le Sui Failautusi o le Va i Fafo a Amerika o se tasi lea o vaega e fai ma faailoga o le mauaa o le galulue faatasi o Samoa ma Amerika.
Talu ai ona o aafiaga o le Koviti ma le tapunia ai o tuaoi a le Malo o Samoa i le lalolagi atoa, o le ala lea na taofia ai foi le tele o nei galuega mo le saogalemu.
