Ua faaui i tua le suafa o le sui tauva o le Tautua Samoa na resitala ma faaulu mo le sailia o sui usufono o le Palemene mo le itumalo Aleipata Itupa i Lalo.
Na pau lea o le sui faatū le susuga Su’a Samuelu Su’a na tauva i le palota ia Aperila ua toe faasolomuli i tua mai le lisi o le to’a 22 o sui tauva na faaulu atu aua faiga filifiliga mo itumalo faapalota e fitu lea ua toe foi i palota laiti.
Ua faailoa lautele e le Ofisa o le Komisi o Faigapalota nofoaga o fale palota mo ia itumalo e 7 atoa ai ma nofoaga mo fale palota faapitoa i Upolu aemaise i totonu o le taulaga. O le a lē toe malaga mamao i Savaii mo le palota laititi ae o le a faaaoga fale palota faapitoa.
E pei ona silafia o le 7 itumalo faapalota o le a faia a latou faiga filifiliga laiti i le Aso Faraile o le vaiaso fou e aofia ai Sagaga No.2, Sagaga No.4, Falealupo, Aana Alofi No.2, Aleipata Itupa i Lalo, Safata No.2 ma Falealii No.2.
