O le toaiva o taulelea mai le nuu o Faleula o loo molia e leoleo i le gaioiga na faaumatia ai le fale o se aiga i le afi poo le malaia, i lea afioaga i se masina e lei mamao tele atu.

O le toatasi o i latou ua tuua le atunuu e pei ona faailoa e le loia a leoleo, ina ua toe valaau le mataupu lenei i le Aso Gafua o le vaiaso nei, i luma o le afioga i le faamasino o le faamasinoga sili le afioga Fepuleai Ameperosa Roma.

Sa talosaga le loia a leoleo mo se tusi saisai peitai e lei talia e le faamasino lea talosaga ona e lei tuuina atu e leoleo se tusi e samania ai lea alii e oo atu i le aso o le faamasinoga.

O le taulealea ua alu ese ma Samoa o PJ e iloa i le isi ona igoa o Tetele Pii Lepale, ae mo le isi toavalu o i latou na tutulai i le faamasinoga ua tuu iai le avanoa e saili atu ai i le lesitala o le faamasinoga po ua talia le latou talosaga mo se loia e totogi e le Malo e tulai mo i latou.

O i latou ia e aofia ai Henry poo Eneliko Fretton, Tuaolo Palagi Pii poo Tuaolo Fretton, Vaialia Paneta, Vaiao Makelusa Levasa, Blessed Fretton e iloa i le isi ona igoa o Palasa, Viliamu Fretton o le isi ona igoa o Faleula Pii, Teofilo Fetaia’i Pii, ma Mauaiseaso Teofilo.

E lei tuuina atu ni tali a i latou uma ia i moliaga a leoleo, ma o le a toe valaau i le Aso Gafua 19 o Aokuso o latou moliaga ma e tatau ona maua ai se tali mo se loia e totogi e le Malo e tulai mo i latou.

O le a iloa ai foi i le aso lea se isi faamatalaga mai leoleo i le tasi o taulealea e toaiva iai le aumolia, lea ua alu ese ma le atunuu ae o loo iai moliaga solitulafono o loo tuua’ia ai.

O aiaiga o loo tatala ai i latou nei o le saini i le ofisa o leoleo ma taofia o latou tusifolau.