I ripoti a le Ofisa o le sooupu a le Mālō i le taeao nei ua faamaonia mai ai e le Matagaluega o le Soifua Maloloina e toatasi le tagata ua faaopoopo atu iai latou ua aafia i le vairusi o le Koviti19 ma ua oo atu ai le aofaiga atoa i le to’a 27.

O lea tulaga na faamautu mai i le maea ai o suesuega faafomai (PCR tests) ile taeao analeila na o se tasi o le pasese lea na Malaga mai Brisbane i le Aso Lulu na tea nei sa nofoesea o ia ile Falemai i Faleolo o se tasi o i latou na sili ona latalata i a i latou na muai aafia. 

Ua faamaonia mai foi i Suesuega Faapitoa sa faia i Niu Sila mo suega (specimen) e fitu na lafo mo le suesueina o le ituaiga o le siama ua aafia ai i latou na muai aafia,ma ua faamaonia aio le ono (6) o suega, o le ituaiga o le Omicron Variant, ae o le tasi o le ituaiga o le Delta Variant.

E ui i lea o loo ripotia mai e leai ni foliga tigaiga pe ma’i o i latou ua aafia e le gata i lea o loo manuia uma le isi vaega o le pasese e lei aafia i le vairusi. Ua faamautu mai foi le manuia uma o suega (negative tests) o le toatele o le aufaigaluega na galulue i le taunuu mai o le vaalele ua faanofoesea ai. O le lona tolu lenei o suega mo le aufaigaluega na galulue i le taimi na taunuu mai ai lea malaga ( frontline workers).