A o laumanu’ia ai se isi lafo ua faamoemoe e aveese ai le Fofoga Fetalai ma le sui Fofoga Fetalai, o taualumaga lava a le Palemene i le Aso Tofi lea sa soalaupule ai le lafo lona lua, o le lē faatuatuaina o le Palemia ma lana Kapeneta.

E ui sa faia le faai’uga a le Fofoga Fetalai e faamālōlō le Minisita o Galuega Tetele ma le Minisita o Faalapotopotoga Tuma’oti a le Malo mai taualumaga a le fono ae ua lata ina taualuga le talanoaina o lea lafo, ae sa toe faia le faai’uga a le Fofoga Fetalai e toe faaulufale ia minisita e to’alua o le Kapeneta le tofa Olo Afoa Fiti Vaai ma Leatinuu Wayne Sooialo ina ia auai i le palota tau valaau e sa’ili ai le teena ma le lagolagoina o le lafo o le lē faatuatuaina a le sui faipule o Gagaifomauga 3.

O le lafo na faatū e le tofa Olo ae lagolago e Leatinuu e aveese ai le Fofoga Fetalai ma le Sui Fofoga Fetalai na mafua ai ona faia le faai’uga a le nofoa e faatula’i ese ma taualumaga a le fono ia minisita e to’alua ina ua faaluaina le lafo na faatū e le Sui Fofoga Fetalai e aveese ai ma le fono ia minisita o le Kapeneta.

Na aliali lea tulaga a o saunoa le Minisita o Galuega Tetele i le lafo o le lē faatuatuaina.

O le Minisita o Galuega Tetele ma le Minisita o Faamasinoga sa saini i le tusi na momoli i le Fofoga Fetalai a o le’i usu le fono i le Aso Tofi na faailoa ai le lafo o le lē faatuatuaina o le Fofoga Fetalai.

Peitai sa teena ma lē talia e le fofoga o le fono susuga Papalii Li’o Oloipola Ta’eu Masipa’u lea lafo faasaga atu ia te ia ma le Sui Fofoga Fetalai.