Ua maea nei ona faaleleia ma fausia se auala simā uamea fou mo se vaega o le auala i le atu Safata na faaleagaina i ni lologa ma tafega i ni tausaga e lei mamao atu.
E $2 miliona tala le tau na faatupe ai lenei atinae tauala mai i se fesoasoani a le Faletupe o le lalolagi faapea le Mālō o Ausetalia.
Na amata fuafua le galuega i le taimi o le faigamalo sa iai ma ua oo mai i le taimi o le faigamalo fou o lea ua savalia le 8 vaiaso talu na see atu e pulea le Mālō ma le atunuu ae umusa loa ma tatala aloaia lea galuega I Nuusuatia i Safata.
O le fesoasoani a le Faletupe o le Lalolagi e silia ma le $29 miliona tala Amerika na fausia ai lea auala simā uamea fou faapea nisi o galuega tetele e pei o le auala laupapa simā fou i Samalaeulu, le auala laupapa fou i Leonē i Apia faapea le faaauauina o le galuega o le toe faalautele o le auala mai Apia agai atu i le malae vaalele i Faleolo lea o loo gata mai lea galuega i Malua.
O le afioga i le Minisita o Felauaiga Galuega Tetele a le malo Olo Fiti Vaai na saunoa ai i le tala autu o le tupe “O se tasi nei o galuega faapaaga a le tatou Mālō ma le Faletupe o le lalolagi poo le World Bank faatasi ai ma le Mālō o Ausetalia i lalo o lana polokalame mo le toe faaleleia o auala tetele ma auala kolosi savali, ma ia mafai foi ona tali atu i le ogaoga o aafiaga o lologa ma tafega mai le leaga o le tau”.
O le seleni na faatupe ai lenei galuega na faamealofaina e le Faletupe o le lalolagi ma le Mālō Ausetalia mo Samoa i le masina o Fepuari 2014.
