Ua amata savali le masina fou lenei o Aperila ma le siitaga fou o le tau o oloa tau suauu ma penisini i lo tatou atunuu e pei ona faailoa faalauaitele e le Minisita o le Matagaluega o Tupe a le Malo o loo gafa ma le faatulagaina o le tau o ia oloa mai fafo.
Faaalia e le Minisita o Tupe le afioga Lautimuia Afoa Uelese Vaai, ua faaauau pea le siitia o le tau o suauu ma penisini ona o loo fuafua e faaauau pea e le faalapotopotoga o atunuu o loo gaosia ma tufatufaina suauu le OPEC ona faaitiitia le gaosia o suauu mai le kuata muamua o le tausaga lenei 2024 agai atu i le kuata lona lua.
Ua faailoa foi e le minisita ua matauina foi le siitiia o le tau o felaua’iga poo freight cost o suauu i luga o le vasa ona o osofaiga a le vaega ua ta’ua o le Houthi o vaa o loo felaua’iina nei oloa i le vasa ulaula poo le Red Sea.
O tau fou la ua faatulaga mai mo Aperila 2024 o le penisini ua 3 tala 35 sene i le lita pe a faatusa i le tau sa iai sa 3 tala 24 sene i le lita.
O le suauu kiso sa 3 tala 43 sene i le lita ua sii i le 3 tala 52 sene i le lita, ma le kalasini sa 3 tala 2 sene ua sii nei i le 3 tala 8sene sene i le lita.
