Ua mae’a le fono a le Komisi faapalemene o ona sui e aofia ai le Palemia, o le ta’ita’i o le Itu Agai ma le Fofoga Fetalai ma o se fono masani e faataoto ai galuega a le Palemene o lenei tausaga.
O le Aso Faraile na te’a nei na usuia ai lea fono a le Komisi faapalemene ina ua toe taliu mai i le atunuu le Fofoga Fetalai susuga Papalii Li’o Oloipola Ta’eu Masipa’u ina ua mae’a se fono a le komiti o palemene a Malo o le taupulega o loo avea ai ma sui.
Faaalia e le Fofoga Fetalai o taualumaga a le palemene i le Aso Lua o le vaiaso nei e leai se suiga mai isi fonotaga ua mae’a.
Na fesiligia le susuga Papalii i le tulaga ua laumanu’ia ai se gaioiga e faatū ai se lafo o le lē faatuatuaina e faamuta ai le tofi Palemia o le afioga Fiame Naomi Mataafa, e mafua mai i se feteena’iga faalotoifale i le faafaletui o faipule o le vaega faaupufai o loo tu nei i le foe o le pulea o le Malo.
O le tali a le Fofoga Fetalai, e le’i taunuu atu i lona ofisa sea fuafuaga, ae afai o iai se tapenaga faapea, o loo iai ala o le tulafono faavae ma tulafono tumau a le Palemene e faatino ai, ae afai foi e oo sea tapenaga, e muamua ona tuuina atu i le Ta’ita’i o le maota o le Palemia lea, mo sona finagalo pe aofia lea tapenaga i le pepa o galuega a le fono aoao faitulafono.
O le ‘afa o le iva i le taeao o le Aso Lua o lenei vaiaso e toe tauaofia ai le fono aoao faitulafono mo ana galuega faaauau, e pei ona tolopo mai iai a o tauaofia le fono usu a Samoa i lana fono faai’u o le tausaga na te’a nei lea sa tauaofia i le masina o Tesema 2024.
