Ua faamauina nei i le talafaasolopito o taaloga o le Olimipeka le mafai ai e se uluai tagata Pasefika ona saofagā atu e sue avanoa mo pine o le taaloga o le togi pulu salafalafa poo le discus, e pei ona saofagā atu ai le sui o Samoa le alii o Alexander Melei Rose.

O le Aso Tofi i Samoa ae o le Aso Lulu o le vaiaso nei i Farani o le a faia ai finals o lea taaloga.

E 62 tesimale 88 mita le mamao o le togi a Alex Rose na ia ausia ma mafai ai ona sao atu i le sailiga siamupini o le Olimipeka.

E faamauina i le 68 tausaga i taumafaiga i lenei taaloga faavaomalo, o le uluai tagata Pasefika lea ua saofagā atu po ua qualify i taaloga afeleti.

Ma i le itulau a lenei alo o le atunuu na faaalia ai lona agaga faafetai ua mafai ona ia ausia lea matati’a e ui e lei mae’a ana taumafaiga, ae o le mitamitaga ia te ia o lona mafaia lea ona oo atu i se isi laasaga o taumafaiga i le Olimipeka.  

O le alii o Alexander Rose, na fai ma avefu’a a Samoa i le taaloga o le Olimipeka i le tausaga e 2016, ma le tausaga e 2020, ma o lona avanoa lona tolu lenei lea ua ia ausia ai lenei matati’a.

O lenei alii sa auai atu i taaloga o le su’ega siamupini o afeleti i le lalolagi i le tausaga 2022 na ia sao atu ai i su’ega avanoa mo pine poo le finals, na ia tulaga 8 ai i le lalolagi.

O loo ia umia se matati’a o le togiina o le ipu mafolafola i taaloga a atunuu o le Oceania i le mamao e 70 tesimale 39 mita.

O lea matati’a na ia ausia i taaloga a le Oceania na faia i Oklahoma i Amerika ia Aperila o le tausaga na te’a nei 2023.

O le tausaga e 2012 na umia ai e Alex le tulaga tagatanuu Samoa ona o lona piitaga i lona tuaa tamā.

O le ‘afa o le fitu i le taeao o le Aso Tofi taimi i Samoa ae o le ‘afa o le ono i le taeao i le taimi Niu Sila o le a faia ai finals o le togiina o le ipu mafolafola le discus lea o le a tausinio ai Alex Rose ua 32 tausaga o lona soifua.