Ua aumai le faafetai a le faiaoga o le ‘au siisii u’amea mamafa a Samoa le afioga Tuaopepe Jerry Wallwork i le tapuaiga a le atunuu, a o faagasolo le tauvaga siisii i Initia lea ua pine auro ai lea na muai pine auro ai Vaipapa Nevo Ioane, sosoo ai ma le pine auro a Don Opeloge.
O Don na ia ausia le aofaiga o le mamafa e 379 kilokalama i le vaega o alii sa sii i le mamafa e 102 kilokalama.
Sa ia ausia le mamafa e 179 i le sii o le snatch ae 207 i le sii o le clean and jerk.
Ua faatuina ai foi e Don Opeloge ni matati’a se tolu mo taaloga siisii u’amea mamafa a Malo o le Taupulega ma se matati’a mo taaloga a atunuu o le oceania.
O Vaipapa na ia ausia le mamafa e 280 kilokalama i le tuufaatasiga o lana sii i le mamafa e 67 kilokalama.
I se tala lata mai i le taamilosaga lakapi o le Ipu o le lalolagi i le vaega o alii i le matutua ei lalo o le 20 tausaga o loo faagasolo i Aferika i Saute, ua manumalo le Manu Samoa laiti le Junior Manu Samoa i lana taaloga muamua o le taamilosaga, e 34 o latou ‘ai i le 25 a le ‘au a Kenya.
Ua faailoa e le pulega o le ‘au a le atunuu e ta le malologa o loo ‘ai silia le Manu Samoa laiti 13 i le 5 a Kenya.
