O loo siomia nei e le Vaega faaaupegaina a leoleo se fale I Northland ile maea ai o le faalauiloa o lipoti e faatatau I se malu o le malo na tafana ane e ni alii se toalua I le taeao analeila.
Ole faalavelave na tulai mai ile State Highway 1 e lata I le Puketona Junction poo le kuata e tea ai le fa I le vaveao, fai mai lipoti a le stuff na agai ane se taavale I luma o le taavale a leoleo ma tu I le ogatotonu o le alatele, toalua alii na feosofi ane I fafo ma tafana ane leoleo o loo I totonu lava o le taavale I le taimi lea e pei ona faamaonia e le Taitai leoleo o Tony Hill. O loo iai isi lipoti e faapea na valaau ane leoleo I se faalavelave I le itu I matu o Kerikeri e foliga e iai sona sootaga I le faalavelave lea I le taeao. Faailoa mai e lei aafia malu o le malo e ui na faaleagaina faamalama o le latou taavale. O loo faaauau pea nei suesuega ae ua lapataia le atunuu e silafia ni faamatalaga I nei faalavelave ina ia faafesootai le ofisa o leoleo I Kerikeri I le numera 105 poo le Crimestoppers ile0800 555 111. O loo galulue nei leoleo ile sailia o I latou o loo aafia I lenei faalavelave.
