Ua i lima nei o leoleo mo ni suesuega se faalavelave na tulai mai i le taeao o le Aso Lulu o le vaiaso nei na maliu fasia ai se tina 34 tausaga o loo maitaga.
O le toalua o lea tina ua molia nei i le faia o se gaioiga lē talafeagai e faaaoga ai se auupega o se tamai naifi (sei tulou). O le afiafi o le Aso Lulu ina ua maua se feiloaiga ma le Sui Komesina o Leoleo le susuga Auapaau Logoitino Filipo na ia faaalia ai o se feeseeseaiga i le va o le ulugalii na mafua ai ona tuli e le tamaloa lona toalua e alu i lo latou aiga.
O le feeseeseaiga lea na tupu i le amataga o le vaiaso nei sosoo ai ma le toe foi atu o le tinā i le aiga o lona toalua o loo faamautu ai ae tupu ai loa ma le faalavelave.
Faaalia e Auapaau o lē ua molia ma taofia sa tagofia le ava malosi i le taimi na ia faia ai le solitulafono ae o loo masalomia foi leoleo na ia tagofia ma fualaau faasaina.
Ao faagaoslo susuega a leoleo ua faaalia e le Sui Komesina e ono iai nisi moliaga e molia ai le tama ua tuuaia ae o le taimi nei o le solitulafono o lona faaoo le maliu ua molia ai.
