Ua mae’a aso e fā sa faatino ai e le vaega mai le malo o Amerika e ta’ua o le Nevada National Guard se a’oa’oga mo nisi o tagata faigaluega o le Pulega o Uafu ma Taulaga faatatau i le puipuiamalu o uafu mai gaioiga faasolitulafono i luga o fesoota’iga faaonaponei le Cybersecurity.
O se a’oa’oga sa fetufaa’i ai ofisa sinia mai lea tautua a le malo ma sui o le Nevada National Guards ina ia mafai ona malu le puipuia lelei o o tatou uafu mai ia gaioiga aemaise o le taofia ai o le sao mai i le atunuu o ni faiga solitulafono e lamatia ai le saogalemu o o tatou uafu.
O le Nevada National Guard ua mae’a faamautū ona sootaga ma Samoa e fesoasoani mai ai i le puipuia o le saogalemu o o tatou uafu, o fesoasoani i taimi o mala faalenatura, faapea polokalame e tapenapena ai e tali atu i ni faalavelave faafuase’i.
