O le vaiaso fou lenei e amata usuia ai le fonotele i Malua a le Ekalesia Faapotopotoga Kerisiano Samoa le EFKS, peitai ua faailoa e le Failautusi aoao o le ekalesia ua lē faataunuuina le fono o lenei tausaga, e mafua ona o vavao ma tapu o puipuiga o le faama’i.
E lē o mautu se tonu i le taimi nei pe o le ā se masina o lenei tausaga ae pe faataunuu lava e fua i aiaiga o poloaiga o vavao o le faama’i Koviti-19. O le tausaga na tea nei sa usuia le fonotele i Malua ae sa faaaogā fesootaiga faatekonolosi e fesootai ai usugafono i Samoa ma usugafono i fafo ona o le tapunia o malaga masani a vaalele.
O aiaiga ua iai nei vavao o puipuiga o le Koviti-19 ua tatala le numera o tagata i potopotoga peitai o se suiga ua lē talafeagai ma le faamautu o fuafuaga i le usuia o lea faatasiga tele faaletausaga e fono ai le ekalesia mo le talanoaina o mataupu masani i lona atina’e i le itu faaletino ma le faaleagaga.
