O loo lagolagoina e nisi o sui o le maota le councillor o Maungakiekie-Tamaki, Josephine Bartley a o toe salalau ai faamatalaga a le pulenuu o Aukilani na pei ua faamatilatila ese ai lava Bartley pe a faatusatusa atu i isi.
O saunoaga nei a le pulenuu ia Wayne Brown na faia faasaga ia Bartley ao iai i se taumafataga sa faia ma faapea mai ai Brown, o ana councillors e leai se isi e atoatoa ona lelei pe faaletonu, peitai o Josephine Bartley ua tauau ina ova ma le laina faatapulaa.
O Bartley o se tasi o councillor o loo tumalosi ma finauina lona le lagolagoina o le faaitiitia o tupe o loo tuuina mai e le council e faatupeina ai polokalame i tua i le komiuniti e pei ona iai i faatalanoaga o le paketi a Aukilani lea ua tapunia.
E ui e leai se tali aloaia a Bartley e tauala mai i tusitusiga ma ofisa faasalalau, i luga o le Twitter o loo ia ta’ua ai o ni lafoga e le o fesoasoani i le taumafai e aoao tupulaga talavou e aua le tusitusilima ma i le manatu o le councillor o Aukilani i Saute lea ua lotea mai e le pulenuu.
Ae mai le taitai tamaitai o le Green Party, Marama Davidson ua ia faia ai tala o le puipui ia Bartley.
O Bartley o ia o le councillor na molimauina lona tu malosi mai mo le komiuniti Pasefika na aafia i taimi o le afā, ma o lea lava foi ua toe molimau ai nisi o le Maungakiekie-Tamaki Local Board.
