Ua ioeina e se alii mai Ausetalia o Matthew Hodder lona moliaga i le faamasinoga maualuga i Dunedin, o le taumafai lea e umia le fualaau faasāina o le cocaine mo le faatauina atu.

Ta’ua e le leitio faavaomalo a Niu Sila o Hodder e 32 tausaga mai Melepone ma o le a lauina lona iuga i le masina o Fepuari o le tausaga fou ae o le fualaau faasāina pe ā ma le 27 miliona lona tau sa teuina i totonu o le vaa la’u container le Spirit of Auckland.

Faapea se faamatalaga o lipoti ma faamaumauga e faatatau le fuafuaga lea i le fualaau faasāina sa pasi mai leoleo Amerika agai i Ausetalia ma o latou mataitu ai le vaa lea ina ua taula foi i Ausetalia.

Faatoa pue e leoleo Niu Sila Hodder ma le isi alii na la toalua i Dunedin ma molia ai i lenei mataupu.

Fai mai e 91 kilo o le cocaine e lē taumate na fuafua le aualii ia e faamanatu lelei ai le la kerisimasi ae o lea ua lē taunuu.