Na faailoa mai e taitai o vaega fauapufai e lua i le aso ananafi le HRPP lea o loo taitai ai Tuilaepa Lupesoliai Sailele Malielegaoi ma le taitai o le FAST Fiame Naomi Mataafa e tatau ona feiloai ina ua maea ona tuuina mai le faaiuga a le faamasinoga faasaga i le apili o le nofoa faaopoopo o tamaitai i le Palemene.
Peitai e esese aiaiga o loo mananao ai nei taitai ina ia feiloai.
I se faatalatalanoaga a Tuilaepa ma Tusitala Samoa i le afiafi ananafi na ia faailoa ai le iuga a le faamasinoga e faapea e tatau lava ona to’aono sui tamaitai i le Palemene ma e iai lona talitonuga o loo i lalo pea o lana taitaiga (Caretaker) le malo o Samoa seia maea uma faamasinoga o tagi o le faigapaltoa ma palota laiti.
Taua foi e Tuilaepa o se feau taua na ia maua mai i le faaiuga a le faamasinoga e faapea ” ia fai se lua galuega Tui ma Fiame”
Ae na taua e Fiame i sana faasalalauga e tatau ona o latou feiloai ma Tuilaepa e talanoaina le alu ese mai o le taitai o le HRPP ma le Ofisa o le Palemia ma talanoaina ai vaega e pei o le faatumauina pea o le 26 a le FAST ae 25 le HRPP.
E le’o mautinoa mai poo afea o le a faataunuu ai lenei feiloaiga.
