Ao talia ai le faaiuga o se tasi o mataupu taua mai le faamasinoga toe iloilo poo le faamasinoga apili na maitauina le auai o Loia atamamai mai Niu Sila e finauina mataupu e ta’iala ai le lumanai o Samoa i luma o le faamasinoga i le Aso Faraile 16 o Iulai 2021.
O nei Loia e aofia ai Paul Rishworth, Robert Lithgow ma Benjamin Keith.
O Paul Rishworth o se alii Loia QC mai Niu Sila lea na tulai mo le vaega faaupufai a le HRPP faatasi mai ma le Loia Sili talu mai le amataga o nei faamasinoga. O le tomai faapitoa o Rishworth e aofia ai mataupu tau tulafono ma aia tatau o tagata ma o se alii polofesa o mataupu tulafono i le Iunivesite o Aukilani ma o ia foi o le faatonu o le Human Rights Law Center. O ia o se sui o le komiti o faufautua a le Sosaiete o Loia ma le Aia Tatau o tagata ma na avea ma Loia Sili o Pitcairn Island i le tausaga e 2007 agai atu i le 2015. O le tausaga e 2014 na avea ai Rishworth ma Loia QC i Niu Sila.
O Robert Lithgow o se alii Loia QC foi mai Niu Sila ua silia ma le 30 tausaga o galue i lea galuega ma o le tausaga e 2007 na avea ai loa ma Loia QC e oo mai i le taimi nei. E tele mataupu tau solitulafono matuia na galue ai Lithgow e tau foia e pei o le Civil and Criminal ma le tele o nisi mataupu eseese. Na ia tulai e fai ma sui o le Samoa Law Society e tulimatai ai le faatinoga o galuega ma auala faaletulafono i totonu o Samoa.
O le alii loia ia Benjamin Keith na tulai mo le FAST mai le amata o finauga o mataupu tau upufai ua loa foi lana tautua i mataupu tau tulafono i Niu Sila. E tele foi ina galulue faatasi ma faalapotopotoga tumaoti i mataupu eseese o le tulafono ae le gata i lea o nisi o vaega i maliega e pei o le Treaty of Waitangi. E tele foi tomai faapitoa o lenei alii loia e aofia ai mataupu tulafono faavaomalo, o tulafono o faavae, o le aia tatau o tagata, tulaga tau faamasinoga ma nisi o tomai e agavaa i lalo o tulafono.
O le tuaa foi o Benjamin Keith sa avea ma faamasino (court of appeal judge) i Samoa le afioga ia Kenneth Keith. O ia foi o se Loia QC talu mai le tausaga e 1994 ua loa foi lona sao i le galuega o mataupu tau tulafono. Na avea foi o ia ma Peresetene o le Law Commission i le tausaga e 1986- 1995. E le gata sa galue i Samoa o se faamasino o le faamasinoga toe iloilo ae sa galue foi i isi atu motu o le Pasefika e pei o le Atu Kuki, Niue ma Fiti.
O le mataupu sa finauina i le Aso Faraile na tea nei o le talosaga ai le Ofisa o le Loia Sili e faaleaogaina ai le faaiuga na tuuina mai e le faamasinoga i le aso 28 o Iuni ina ia tauaofia le Palemene i totonu o le 7 aso lea o loo faauau pea le musu o le taitai o le HRPP Tuilaepa Lupesoliai Sailele Malielegaoi e usitaia faaiuga a le faamasinoga ma ia faapea e nao le Ao o le Malo e iai lea malosiaga.
O le finau a Lithgow ma le Samoa Law Society na manino le faaiuga a le faamasinoga ina ia tauaofia loa le Palemene i totonu o le 7 aso peitai e le’i faatuanuuina lenei faatonuga ae toe apili e le Loia Sili ma lea na lagolagoina e le HRPP.
Taua e Lithgow “o le faavae o loo manino ai le tele o tulaga e tatau ona faatino, o le a le isi gagana e faaleo ai pe a fai e le faalogo ma faatino le faatonuga?”.
O le folasaga a le Loia Sili lea o loo tulai mai ai Paul Rishworth e faapea o le ala o le talosaga a le Loia Sili ona o le fenumia’i o le faaiuga a le faamasinoga na tuuina mai i le masina na tea nei. Taua e Rishworth o le auga o le faamasinoga lea ina ia tali le fesili pe e solifaavae le faatautoga na fai pe leai, ma e le talafeagai le tuu mai o isi faatonuga e le’i iai i le vaega o le fesili.
O le finau mai a Benjamin Keith e faapea e talafeagai le faatonuga na tuuina atu e ala i le tauaofia o le Palemene i totonu o le 7 aso ma e leai se tulaga nunumi pe e le malamalama i lea faaiuga aua o loo manino auala na tuuina atu ai. Na ia taua foi o lea faaiuga na auala mai i tulaga o le faavae ma e tatau ona usitaia.
O Loia uma nei e toatolu mai Niu Sila lea sa finauina mataupu loloto o le tulafono mo le lumanai o Samoa i luma o le faamasinoga, ma na tauala mai i tekonolosi faaonaponei (video call).
O nei finauga na fofogaina i luma o le afioga i le Faamasino Sili Satiu Simativa Perese faatasi ai ma tamaitai faamasino ia Niava Mata Tuatagaloa ma le afioga ia Tafaoimalo Leilani Tuala Warren.
O loo tatalo le atunuu ina ia maua se faaiuga tonu o lenei faamasinoga.
