O siufofoga mālie o le aufaipese tuufaatasi a Kolisi faafaifeau i Malua ma Piula o le a faafofoga iai le Tupu o Salesa ma lana Masiofo o Camilla, faapea ta’ita’i o malo uma e 56 ma latou usugafono, i le sauniga lotu e tatala ai lea fono tele i le masina fou.

O a’oa’o ma o latou faletua o loo a’otauina i totonu o ia kolisi faafaifeau i le atunuu, o le a peseina viiga o le sauniga lotu.

Ua faailoa lea fuafuaga e sui o le komiti o loo gafa nei ma tapenaga o le tatalaina o le fono, e pei ona faailoa e le afioga A’eau Chris Hazelman o le Ofisa Sili o le matagaluega o taaloga ma aganuu, e na o le 90 minute le umi o lea sauniga, lea o le a aofia ai ma saunoaga togia, e pei o le Palemia o Samoa, ta’ita’i o le Malo o Rwanda lea sa talimalo i le fono mulimuli a Malo o le Taupulega, ae taualuga i le saunoaga a le Faaao o Malo o le taupulega, le Tupu o Salesa III.

O faafiafiaga o loo tapena e nisi o faia’oga, ma fanau aemaise o le aufaafiafia a le Onomea Productions, ma autalavaou o le EFKS mai Laulii ma Falealili.

O se tasi o tapenaga o loo feagai ma lea soākomiti o le polokalame lea mo ta’ito’alua o Ulu ma Minisita o le Va i Fafo o Malo o le Taupulega.