I le tuana’i ai o le Aso Gafua na toe tupu ai le vevesi i nisi o fanau a kolisi o Maluafou ma Sagato Iosefo, oo mai i le Aso Lua, ma le Aso Lulu o lenei vaiaso ua fifilemu ua lē toe vaaia ia vevesi i le taulaga, o le Aso Tofi o le vaiaso nei lava na feiloa’i ai pulega o kolisi e lua ma fanau a ia kolisi maualuluga e lua, e faatino se leleiga.
Ua ave ai ma upu faufautua ma upu tima’i i alo ma fanau a le atunuu o a’oa’oina i nei kolisi ina ia faauma ma faamuta loa ia vevesi.
Ua faatoese le Kolisi o Maluafou faapena foi le Kolisi o Sagato Iosefo ma ua toe teuteu ma fonofono masaesae o le upega ona o amio a nisi o fanau ua ta’uleagaina ai le igoa lelei o ia kolisi maualuluga a le Ekalesia Katoliko i Samoa faapea le Ekalesia Faapotopotoga Kerisiano Samoa.
O ata video na pu’eina e nisi mai lea leleiga o loo molimauina ai saunoaga ma tuleiga ua toe auli ai ni futia ua sola, ae fusifusi, feasogi, ma lūlūlima faia’oga ma fanau a ia kolisi e lua.
