E manino le fe’au mai le matagaluega o le va i fafo mo tagata Kiwi o loo iai nei i Isaraelu, Lepanona ma Iran, ia o ese mai nei loa.
A o leai ai pea se filemu i le va o atunuu nei e tolu, o le fe’au tuusa’o lea mai le matagaluega o tagata Kiwi o loo iai, ae mo tagata o loo fuafua e asia, o le fe’au mo i latou, o le aua ne’i asiasi iai.
I le tolu masina talu ai o lea sa augani mai lava le matagaluega i tagata Kiwi o loo i Lepanona faapea ai ma tagata o loo fia o iai, peitai o osofa’iga ananafi ua faaopoopo ai nei ma Isaraelu ma Iran i le lisi.
E oo mai ananafi i le taimi na sau ai lapata’iga mai le matagaluega e tusa ma le 174 tagata Kiwi o loo lesitala i le SafeTravel o loo i atunuu nei e tolu.
Ae mo le to’atele o tagata i Sasae Tutotonu o loo iai i se tulaga lē mautonu ona o vevesi o loo faaauau pea.
