Ua faaauau pea ona faamautū i Samoa le tamā matua o Roderick Ignatius Mackenzie o Lotopa ma Amerika Samoa e faatali ai lona faamasinoga ma isi tagata e to’alua i moliaga o le faaulufale ma le umia o le nakoti le pauta faasāina o le aisa.
E iai gasegase o le tamā, o se tagatanuu o Amerika Samoa, ma e mana’omia ai ona tuua le atunuu ae malaga i Tutuila e vaai ana foma’i.
O le mafua’aga lea o lana talosaga i le faamasinoga sa finauina e lana loia, ina ia toe iloilo aiaiga o loo tatala ai i tua, ae tatala atu le avanoa e malaga ai se’i fai ana talavai ma vaai le foma’i.
Peita’i sa tetee loia a leoleo e tatala lē ua molia e malaga ese ma le atunuu ona o atugaluga i le lē toe foi mai o Roderick Mackenzie i lona faamasinoga ua faatulaga mo le masina o Setema o le tausaga nei.
Sa tetee foi leoleo ona e lē o iai se feagaiga a le malo o Samoa ma le faigamalo a Amerika Samoa ma le Iunaite Setete o Amerika e mafai ai ona aumai faapagota lē ua molia mo lona faamasinoga.
Sa finau le loia a Roderick ua nofo sauni lē ua molia e totogi soo se aofa’iga o se tupe e faamaonia ai lona toe foi mai e tali ona moliaga.
Sa tuuina atu foi e lē ua molia ni faamaoniga se lua poo surety e saini ai ni tagata e mafai ona latou totogi se tupe e avea ma faamaoniga o lona alu ese ma toe foi mai pe a uma ana siaki faafoma’.
E ui i ia vaega uma sa tuuina atu, ae na taunuu le faai’uga a le tamaitai Faamasino le afioga Leutele Niavā Mata Tuatagaloa, i le teena o le faia o ni suiga i aiaiga o le tatala i tua o Roderick ona e telē le avanoa pe a malaga ese ma Samoa, e lē toe foi mai ai e tali ona moliaga.
Ua faailoa i faamaumauga a le Faamasinoga Maualuga i lana faai’uga tusitusia i le talosaga ua teena, o loo iai le talitonuga o le aisa pito tele lea ua aumai i Samoa o loo molia ai Roderick Mackenzie ma isi tagata e to’alua e aofia ai se tamaitai.
O le 10 kilokalama o le aisa ua masalomia na faaulufale faasolitulafono mai i le atunuu i se pusaoloa, e tusa lona tau ma le 9 tesimale 5 miliona tālā Samoa.
odewiO Roderick o loo faagaioia sana pisinisi o se faleoloa supamaketi i Lotopa, o le nofoaga lea na maua iai aisa sa aumai i se pusaoloa a le pisinisi a lē ua molia.
