O le faatulagana maualuga o le soona puputa o tagata i le Pasifika ua lē o se mea fou, ae o le soona puputa o tamaiti o se atugaluga, e pei ona faaalia ai e se taitai o le soifua maloloina o tagata Pasifika i Niu Sila.
I se suesuega i le lalolagi atoa i le tulaga o iai le paee ma le soona puputa, e lata mai nei sa lomia ai i le lomiga a le soifua maloloina a le The Lancet Medical Journal sa faailoa ai, o Tonga ma Amerika Samoa ua pito maualuga atu ai le faatulagana o tina ma tamaitai ua soona puputa.
Ae o Nauru ma Amerika Samoa e pito sili atu ona maualuga ai le faatulagana o le itupa o alii e soona puputa.
O lea lipoti, sa faasolo mai le 1990 e oo mai i le 2022, sa maua ai, ua faafāina ua oo iai le faatulagana o le soona puputa o tamaiti ma tupulaga matutua i le lalolagi.
O Sir Dr Collin Tukuitonga, o le polofesa lagolago, ma le faauluuluga lagolago Pasifika ma se faatonu o suesuega i le aoga faafomai i le Iunivesete o Aukilani – sa ia faaalia, o le iuga o lea suesuega i tamaiti soona puputa o se atugaluga.
Ma sa ia ta’ua ai, o faamaumauga faalotoifale i Niu Sila ua faailoa ai, o le luavaetolu o tupulaga talavou teine Pasifika e soona puputa ma ova tele le mamafa, ma se faagasologa o le siitia o tamaiti soona puputa ua iai nei.
Faaalia e Sir Collin, o le soona puputa o se taua ua umi o tau mai ma motu o le Pasifika.
Ma ia ta’ua ai, o le faafitauli e faigata tele ona puevaeina, ma e mafua mai lava lea i taumafa, ma tagata e lē o toe gaioi e pei ona sa masani ai.
Ae o lea suesuega i le lalolagi i le paee ma le soona puputa ua faailoa ai, e silia ma le piliona o tagata i le lalolagi e soona puputa.
E aofia ai i lea fuainumera le 880 miliona o tagata matutua ma le 159 miliona o tamaiti, ia Tonga ma Amerika Samoa e pito maualuga ai le faatulagana o tina ma tamaitai soona puputa, ae o Amerika Samoa ma Nauru i le itupa o alii, i se vaega o le 70-80 pasene o tagata matutua soona puputa o feola ai.
Faaalia e le vaega o saienitisi faavaomalo, o loo iai se manaoga vave mo ni suiga tetele e faia i le faapefea ona puevaeina le soona puputa.
O le soona puputa e siitia ai le tulaga lamatia i le aafia ai i le tele o aafiaga o le ola maloloina, e aofia ai ma’i fatu, ma’i suka 2 (Type 2 diabetes) ma isi kanesa.
O le alii suesue sinia Polofesa Majid Ezzati, o le Kolisi i Lonetona a le Imperial College London, sa ia logo i le vaega o tala a le BBC, o le tele o motu o loo aafia i le soona puputa o ona tagata, o se tulaga lea i le lē maua o meaai lelei mo le ola maloloina ae na o meaai lē lelei.
