E oo atu i le lima auaunaga mo le ola maloloina lelei o ta’ifau o loo faagasolo nei i le talafatai o Apia e amata atu i le asō, Aso Tofi seia pā’ia le Aso Lulu 24 o Iulai 2024.
O lea auaunaga o loo mafai ona galulue faatasi ma lagolagoina e le Pulega o Tagata Tafafao Samoa Tourism (STA), APS Samoa (APS, Vets Beyond Borders (VBB), Dog Management Unit (DMU) poo le vaega e mata’ituina ta’ifau a le Matagaluega o Leoleo ma le Pulega o Uafu a Samoa le Samoa Ports Authority (SPA).
O loo faatupeina e le Malo o Niu Sila e tauala atu i le Matagaluega o le Va i Fafo ma Fefaataua’iga (New Zealand Ministry of Foreign Affairs and Trade)
O ia auaunaga o loo faatino e aunoa ma se totogi, ma ua faapena ona faalauiloa lenei polokalame tāua mo le mamalu lautele o le atunuu, aemaise i latou o loo iai ta’ifau.
O le naunauta’iga lava ina ia ola maloloina lelei ta’ifau, ma ia mautinoa o loo faatino uma foi vaega e tatau ona fai e le tagata e onaina maile poo ta’ifau.
O auaunaga e aofia ai le lesitalaina o ta’ifau, o siaki, le faia o tuipuipui ma ta’otoga e fofō poo le de-sex e pei ona masani ai.
Ua tuu mai foi se laupepa o faamatalaga e faailoa ai aso, taimi ma nofoaga o le a faatino ai auaunaga nei.
Ma ua fautuaina foi le mamalu o le atunuu e faaaogā lenei avanoa lē aumaua.
