O le lima tausaga ua mavae talu mai Tesema o le tausaga e 2020 na tuuina atu ai tulaga tagatānuu poo sitiseni Samoa mo tagata e to’asefulufa o isi atunuu i fafo sa talosaga, o lea ua faaopoopo pea le numela o tagata mai fafo ua manuia talosaga mo ni sitiseni Samoa.
O le vaiaso ua mavae na faamautū ai le avea ma tagatānuu o Samoa o tagata e 39, o nisi o ulugalii ma latou fanau ua tele tausaga o aumau i Samoa ma galulue ai a o nisi o loo faatino a latou pisinisi.
O le afioga i le tamaitai Palemia o ia o le Minisita o le ofisa o mataupu tau femalagaa’iga a le Malo sa saunoa e faafetaia i latou ua maua sitiseni Samoa ona o lo latou sao i le tamaoaiga o le tatou atunuu.
O le tuai maua o tali o talosaga a le to’atele o i latou ona sa fetaui le taimi na mae’a ai le isi faatautoga o tagatānuu Samoa o le to’asefulufā na faamanuiaina talosaga i le faai’uga o le tausaga e 2020, ma le pipisi o le faama’i koviti sa tele ina taofia ai le tele o auaunaga masani.
O i latou ua manuia ma talia taosaga mo le avea ma tagatānuu o Samoa e malaga mai isi i atunuu Asia e pei o Saina ma Initia, o isi e mai Sasa’e Tutotonu e pei o le atunuu o Iran, ae o isi e mai le Atu Europa ma isi e mai le Pasefika.
E lē gata o loo galulue nisi ia latou pisinisi ae o isi ua maua sootaga ona ua mau paolo pe faaipoipo atu i nisi o o tatou tagata.
