O tausi soifua le isi tomai a’oa’oina o loo mana’omia e le Matagaluega o le Soifua Mālōlōina i tausaga uma, ona o le to’a gaogao o le aufaigaluega, e mafua o isi ua faamavae, o isi ua mālōlō litaea, ae o isi ua malaga i fafo pe suia foi ni tautua tau soifua mālōlōina ua galulue ai.
O le faai’uga o lenei tausaga ua faaopoopo atu ai le tasi o vasega o alii ma tamaitai tausi soifua ua faauu, e lē aofia ai isi ua ausia faailoga tikeri ma le Post grad.
Ua faailoa e le Matagaluega o le Soifua Mālōlōina i ana auala o fesoota’iga le 64 o le vasega faauu ua amata galulue nei, e aofia ai le to’a sefulufā ua maua faailoga tipiloma, 45 ua maua faailoga tikeri ma le to’alua o tausi soifua o ni faatosaga poo Midwife ua faauu i le faailoga o le Post Grad.
Ua fetaui le ulufale atu o i latou i le galuega ma le mautū o nisi o tapenaga e pei o le siitaga o totogi o tausi soifua.
O le Minisita o lea matagaluega sa saunoa i le sauniga na aloa’ia ai le avea o i latou ma tausi soifua faauuina ua mae’a lesitala.
Le Minisita o le soifua mālōlōina, afioga Valasi Luapitofanua Toogamaga Tafito Selesele.
