Ua faamuta e le Qantas le faia o talifofoga mo nisi o ana faigamalaga faavaomalo e pei ona ta’ua i le lipoti a le 9News i le asō. Ua ta’ua o loo faaauau pea ona galulue le kamupani vaalele i le toe fausia o ana auaunaga i le tulaga na iai a o lei oo mai le faama’i.
O loo ta’ua i le lipoti lea o le te’a o le 12 i le vaveao ananei o le a lē toe mana’omia loa ona faia ni talifofoga mo le auvaa ma pasese a malaga tuusa’o e leai se mālōlō, mai Niu Sa Uelese, Kuiniselani ma Western Australia e aga’i atu i Amerika, UK ma Roma.
A o faaopoopo pea atunuu e faamāmā le tulaga lea i le faia o talifofoga, ua faailoa e le 9News o le a faalauiloa mai lava lipoti aupito lata mai o ia tulaga.
