O le masina fou o Iulai ua faamoemoe e amata ai galuega o le fausia o le isi lala o le fale’aiga o le McDonald’s i le malae vaalele faavaomalo i Faleolo.
Ua faailoa e le Matagaluega o Galuega Tetele ma Fela’ua’iga o loo iai ma le vaaia o le Pulega o Malae Vaalele, lea galuega ina ua mae’a sainia e le pulega o le fale’aiga ma le Ofisa Sili o le pulega o malae vaalele le lisi o le fanua o le a faagaioia ai lea pisinisi i totonu o le lotoā o le malae vaalele faavaomalo i Faleolo.
Ua savali nei le fitu tausaga talu ona faailoa e le pulega o lea fale’aiga lauiloa i le lalolagi lana fuafuaga e fausia se isi lala i le malae vaalele i Faleolo, ae o lea na faatoa sainia i le Aso Lua o le vaiaso nei le lisi o le fanua e fausia ai.
O le tasi o fuafuaga a le pulega o lea fale’aiga sa faailoa foi i le tausaga e 2017, o le fausia o sona lālā i Vaitele i le nofoaga o loo tele ai pisinisi ma fale faigaluega.
O le Ofisa Sili o le pulega o malae vaalele le susuga Tumanuvao Evile Falefatu, ma le loia a le pulega le tofa Namulauulu Elemesi Schmidt na o la sainia pepa e faamautu ai le lisi o le fanua o le a fausia ai le McDonald’s i Faleolo, faatasi ai ma sui o le pulega o le fale’aiga Dolores Tautolo ma Katie Leilua Afuamua.
