O lē sa avea ma faiaoga o le Manu Samoa taitoafitu ma le to’a 15 i tausaga e tele ua tuanai le susuga Faleomavaega Fuimaono Titimaea Tafua lea ua faamaonia lona tamoe ai i lalo o le faamalu a le Faatuatua i le Atua Samoa ua Tasi mo le itumalo faapalota o Aleipata Itupa i Lalo i faigapalota laiti o loo loma nei.
O le nofoa mo lea itumalo ua avanoa ina ua ave le tagi a le sui o le HRPP afioga Tafua Maluelue Tafua o le uso matua foi lea o Faleomavaega faasaga i le sui na manumalo lava o le HRPP ia Fiugalu Eteuati Eteuati.
Na faamaonia e le faamasinoga tuuaiga o faiga faatosina e 21 faasaga ia Fiugalu ae na faaleoagaina tuuaiga e 5 na fai e Fiugalu faasaga ia Tafua, o lona uiga e iai lava le avanoa e toe tamoe ai Tafua i le palota laititi. Peitai ua tuu atu e Tafua le avanoa i lona uso laititi ia Faleomavaega e tauva ai ma o le taimi nei ua suia le vaega faaupufai e lagolago ai Lea ua agai i le FAST.
O Faleomavaega e lē gata sa avea ma Faiaoga Ulu a le Manu Samoa se sa taalo Lakapi foi o kapeteni lea a le Manu Samoa i le la Taaloga ma Uelese i le tausaga e 1986.
Na faiaoga i le au taitoafitu lea na manumalo i le taamilosaga o taitoafitu i le lalolagi i le tausaga e 2007.
E le’o mautu mai le aso tonu o le a faatinoga ai loa faigapalota laiti mo itumalo e 7 o loo avanoa nei nofoa.
