O le finagalo na faaalia e le afioga i le tamaitai Palemia, Afioga Fiame Dr Naomi Mata’afa, e iai mafuaaga tāua e lē soona vavevave ai le Malo e tali mai i nisi o mataupu ogaoga e pei ona iai lagona eseese o loo faaalia e tagata.
Na saunoa Fiame i sana faatalanoaga ma le sui o le Radio Samoa i Hawaii, le susuga Ken Aiono, o le faiga faavae a lana faigamalo o loo iai nei, e tauave lava e le minisita ia a latou lava matafaioi.
Poo ā lava ni faasilasilaga e fai mai lea matagaluega i lea matagaluega, e saunoa lava le minisita ma o latou tauave ma faamamalu, se’i vaganā o se mea mo le atunuu aoao, e pei ona iai le mataupu talu ai nei, sa faasalalau le faiga faavae mo le taofia o faiga faaālatua (anti-corruption policy), o se mataupu mo le atunuu aoao poo se national policy, o iinā e tatau ai ona sau le faasilasilaga mai le Malo lea e iai le Savali o loo faasalalau mai ai mataupu a le Malo.
Ae e iai le isi itu e pei ua faatauanau atu ai se manatu o le Malo i ni mea ua tutupu, aemaise ni mataupu ogaoga ua tele ai tala i luga o le social media, ae o ni mataupu foi ua oo i luma o le faamasinoga.
Ma e oo loa i luma o le faamasinoga, na saunoa Fiame, ona iai lea o lona faaeteetega faa-Ta’ita’i o le Malo, i le faia o se upu poo se tala a le Malo, pe afai ua oo i luma o le faamasinoga.
Na saunoa le tamaitai Palemia, ua ia matauina aemaise lava i luga o le social media, faapea poo le ā le mea e lē faia ai se tala a le Malo, ae ala ona lē faia se tala a le Malo, muamua e leai se feau a le Malo, lua o la ua i luma o le faamasinoga, ma e iai lava ala o mea.
Na ta’ua atili e le Palemia lona atugaluga i le ituaiga o gagana matagā lea ua faaaogā e tagata e lalafo ai o latou manatu feteena’i.
Na saunoa le tamaitai Palemia, e leai se afaina o le faaalia o le eseese o taofi i mea tutupu, ae o le taufaaleaga ma le faaaogā o upu matagā, ua matuā telē ai lava se afaina o finagalo o le atunuu.
E leai lava se lagona e tatau ona taotaomia, ae o le tatou faa-Samoa ma tatou aga, e iai tuaoi o mea uma i le faaalia o lagona; o tatou o tagata Samoa, e iai o tatou tuaoi ma o tatou va; e leai se mea e sili atu i le tausia o tatou va lelei ma le ola fetausia’i.
