Ua faamatamata tetele e le Kovana Sili o Niu Sila i lana saunoaga i le asō mea o le a ave iai le faamuamua a le faigamalo fou i lana nofoaiga mo le isi tolu tausaga.
E pei ona masani ai i tulaga o le sauniga lenei e faia mai le lauga a le Kovana Sili mai le Legislative Council Chambers.
Fai mai le Kovana Sili ua mautu le faamoemoe o le faigamalo fou e faatino mea uma e manaomia ona faia aemaise o le galulue faatasi ma pisinisi, kulupu i le komiuniti ma tagata Niu Sila.
Na faailoa foi e Dame Cindy Kiro se tasi o fuafuaga tāua a le National ina ia faaitiitia lafoga totogi ma faaitiitia le tau o le soifuaga aemaise se tasi itu tāua sa tautalagia i le taimi o faigapalota e faatatau i le tulafono ma le faamautuina o le saogalemu o tagatanuu.
