O le Konesula o Samoa i totonu o le teritori o Amerika Samoa na saunoa e faafetaia le faigamalo a Tutuila ma Manu’a i le sauniga lotu ua faamanatu ai le tutoatasi o Samoa i totonu o eleele o Amerika Samoa mo le uluai taimi.
O le Aso Sa na te’a nei na faia ai lea sauniga lotu e faamanatu ai le atoaga o le 62 tausaga o le tatou tutoatasi i le malumalu o le Ekalesia a Iesu Keriso o le Au Paia o Aso e Gata Ai i le afioaga o Malaeimi.
Sa molimauina i ata mai le faletelevise o le KVZK le faatumulia o le malumalu i le toatele o ē na auai i le sauniga lotu faafetai o le tutoatasi i totonu o le teritori.
O le sui o le Malo o Samoa Tutoatasi i totonu o Amerika Samoa le afioga i le Konesula, Fata Brian Kaio, i lana saunoaga i le faamanatuina o le 62 tausaga o le Malo Tutoatasi o Samoa mo le taimi muamua i totonu o laufanua o Tutuila ma Manu’a.
Na auala mai le saunoaga a le Konesula i le tautua a le KVZK TV i totonu o le teritori.
