A’o tapena ai le faamasinoga i le aso a taeao i le faaauau ai lea o le iloiloina o le mataupu autu i le tagi a le vaega faaupufai a le FAST ina ia aveese le nofoa faaopoopo o tamaitai i le Palemene , na ripotia mai ai se feiloaiga i le va o Taitai o vaega faaupufai e lua na faia i le asō.

O lenei feiloaiga na auai ai le Ao o le Malo Tuimalealiifano Sualauvi II,  faatasi ma taitai o vaega faaupufai e lua ia Fiame Naomi Mataafa ma le taitai faaauau  lē tumau a le atunuu Tuilaepa Lupesoliai Sailele Malielegaoi.

I le afiafi nei i 4:30 (taimi niusila) na faalauiloa aloaia mai ai e le Taitai FAST e moni sa fai fai se latou feiloaiga ma le Ao o le malo faapea le susuga ia Tuilaepa. Taua e Fiame o le ala o lea feiloaiga na faaali ai le manatu o Tuimalealiifano ina ia toe fai le faigapalota a le atunuu on aua feeseesea’i manatu o le atunuu ma ua tele foi tusitusiga eseese i luga o upega tafailagi faatatau i le mataupu.

Taua e Fiame i lana faalauiloa o lenei manatu a le Ao o le Malo na lagoalagoina e le taitai o le HRPP ina ia toe fai se faigapalota . Peitai na faali le manatu o Fiame o ia e lē auai i lea manatu ona o mafuaaga nei
“ Oute lē talitonu e iai se malosiaga faaletulafono i lalo o le faavae o Samoa e faia ai se faaiuga faapea e le Ao o le Malo I lenei taimi.” Lona lua “ o le mafuaaga ua ta’i 26 ai sui o le vagea faaupufai ona o se faaiuga a le Komesina o faigapalota ua faamaonia e le Ao Mamalu o le Malo , ma o nei faaiuga o loo taatia nei i luma o le faamasinoga maualuga mo le iloiloina mo sana faaiuga pe iai se malosiaga i le Tulafono e faatino ai lea tulaga.

Taua e Fiame “o lana tali tusitusia na tuuina atu i le Ao o le Malo ua ia talosaga ai ina ia taatia ese sana faaiuga ae tuu atu le mataupu mo se faaiuga a le faamasinoga maualuga e pei ona iai nei. Afai ae maua se iuga e aveese le nofoa faaopopo ona toe foi lea o le fainumera e pei ona palotaina e le atunuu e 26 le FAST ae 25 le HRPP.

Ae afai e le’o le taunuuga lea o  le faamasinoga , o lona uiga e ao i le Ao o le Malo i le aso e tau aofia ai le Palemene ona faitauina aloaia sui mamalu mo se faaiuga i se tasi ua iai le faatuatuaga a sui o le Palemene , afai ae leai se tasi e tusilima ai sui mamalu o le Palemene i lea taimi faatoa mafai lea ona fai e le Ao o le Malo sana faaiuga ina ia toe fai le Palota a Samoa.”

Taua e Fiame o nei manatu a le Ao o le Malo ma ua lagolagoina e le susuga Tuilaepa e lē talafeagai ma o le a avea ma mea e faavaivai ai le iuga a le faamasinoga ma ua lē talafeagai ma le faaiuga a le atunuu e pei ona latou palota ai.

Na faamanino e Fiame le tulafono e tatau ona mulimuli ta’i iai ma e lē faatulafonoina le manatu o le toe fai o se palota i le taimi nei ao iai le mataupu i luma o le faamasinoga maualuga.