O le asō lea ua fuafua ai le faigamalo o iai nei a Ausetalia e faalauiloa ai i le Palemene nisi o a latou tulafono e faatatau i le faaaogāina o le social media.
Ua feta’ua’ina ai ma se faasalaga e $50 miliona mo kamupani e maua o solia ia tulafono.
O le tulafono e pei ona lipotia afai ae pasia o le a faamalosia ai loa o le 16 tausaga le matua e tatau ona iai le tagata faato’ā mafai ona ia faaaogāina le social media.
O kamupani la e maua o o latou solia lea tulafono e ono oo atu i le $50 miliona le faasalaga e tatau ona totogi.
E iai nisi vaega o loo faatagaina i lalo o ia tulafono fou aemaise i le faaaogāina o auaunaga tau i taaloga e faia i luga o upega tafa’ilagi, online games ma isi auaunaga tau le soifua mālōlōina ma le itu tau a’oa’oga.
E ui e to’atele nisi ua lipotia o loo fesiligia le aogā o lea tulafono peitai e foliga o loo mātele ina lagolagoina i le Palemene.
Fai mai le minisita o Fesoota’iga, Michelle Rowland o le tulafono e faatatau i le puipuia o tagata talavou ma le faailoa i mātua o loo latou lagolago atu ia i latou, fai mai le minisita o le social media e iai lana matafaioi mo le saogalemu ma le soifua mālōlōina o le mafaufau o le tagata talavou i Ausetalia.
Puna o Faamatalaga: https://www.9news.com.au/national/social-media-laws-include-50-million-dollar-penalty-for-companies/eb3e9515-a3e9-4c2b-b128-90167a3dc76b
