E amata atu i le po nanei i le 11.59pm o le a faamuta aloaia loa le toe faamalosia o le faia o punifofoga ma le tele o isi faasasaga i totonu o Niu Sila mo le Koviti. O se faasilasilaga lena ua faamautinoa mai e le afioga i le Tamaitai Palemia, Jacinda Ardern ma le minisita o galuega tau puipuiga e tetee atu ai i le Koviti-19, susuga Ayesha Verrall.
Ma o le a faamuta loa le “traffic light” system lea sa faavasega ai i lanu o moli le faatulagaina o faasasaga sa faia i tulaga tau puipuiga mo le faama’i.
O nei suiga o le a aofia ai mea nei:
- E faatoa manaomia le faia o ni punifofoga pe afai o iai i se nofoaga mo tausiga faalesoifua maloloina ma nofoaga o loo tausia ai tagata matutua: e pei o falema’i, faletalavai, falema’i laiti, nofoaga o tagata matutua, ma nofoaga o loo tausia ai i latou o loo iai manaoga faapitoa poo manaoga tumau.
- O tagata ua faamaonia ua aafia i le Koviti-19 e tatau ona nofoesea mai isi tagata mo aso e fitu, peitai mo tagata o se auaiga o loo nonofo faatasi, o le a le manaomia ona tau faanofoesea, ae tatau lava ona faia a latou RAT test i aso taitasi.
- O le aso 26 Setema o le a faamuta ai le toe faamalosia o le faia o tuipuipui mo tagata faigaluega uma a le Malo.
- E le toe moomia le faia o tuipuipui mo tagata uma e faimalaga mai i totonu o Niu Sila, faapea ma i latou o loo galulue i luga o vaalele.
- E faaauau pea ona maua totogi e fesoasoani ai mo i latou e malolo (leave support payments).
- O tagata Niu Sila uma ua silia ma le 65 tausaga, ma tagata Maori ua silia ma le 50 tausaga o le soifua, e otomeki lava ona latou maua fualaau ma vailaau e tetee atu ai i le vairusi o le Koviti-19 pe afai ua faamaonia mai a latou siaki ua aafia i le Koviti-19.
- E amata atu taeao, le Aso Lua, o le aofai o tagata e aafia ma i latou e taofia i falema’i, o le a faatoa avatu le lipoti faalevaiaso nai lo le lipotia i aso taitasi.
