E foliga mai e lē o aga’i i se taunuuga lelei le faiga faapaaga i le va o Niu Sila ma le Atu Kuki.
O le Atu Kuki ma Niu Sila o loo iai maliega ma faiga faavae o le maliega e tatau ona fefaasoaa’i ma faatalanoa soo se maliega e faia e le Atu Kuki, poo maliega nei o loo aiaia i lalo o le 2001 Joint Centenary Declaration i le va o atunuu e lua.
Peitai o lea ua alu ese mai lava le Palemia o le Atu Kuki, Mark Brown e le’i tali mai lava i le tulituliloa a Niu Sila ina ia talanoa muamua a o le’i malaga i Saina.
E oo mai lava i le aoauli ananafi e le’i maua lava se tali mai le Palemia o le Atu Kuki e tusa ma le tusi atu o le Sui Palemia, o ia foi o le minisita o le va i fafo, Winston Peters ia talanoa muamua.
Ae i lipoti a le 1News o loo tali mai ai le Palemia o le Atu Kuki, o lea na sainia lava e Niu Sila ia ana maliega ma Saina, ma e leai foi la se mafuaaga o le a lē mafai ai ona faia e le Atu Kuki le mea e tasi.
E tuufaatasia tala o le taeao e le’i toe maua mai se isi tala mai le malo o Niu Sila, pau o lea e lē o taliagofie e le malo o Niu Sila le lē talanoa muamua.
Puna o Faamatalaga: ‘Significant concern’: NZ, Cook Islands relationship worsens
