“E lē fou i le faalogo le fesiligia e Winston o le moni o faamatalaga e faaalia atu e le aufaasalalau”, o le tali lea a le alii Palemia, Christopher Luxon ina ua tāpā sona finagalo i le mataupu na alia’e mai i le va o le Minisita o le Va i Fafo ia Winston Peters ma se alii tusitala o le RNZ.
O lenei mataupu, na tula’i mai i se faatalatalanoaga a Winston Peters ma le leitio faavaomalo a Niu Sila i lenei vaiaso ina ua fesiligia e le alii tusitala o Corin Dann le Minisita mo sona finagalo i manatu a nisi o vaega faaupufai, e aga’i i se tulafono taufaaofi o loo i luma nei i le Palemene.
Na faasalavei le alii Minisita ma fesiligia loa le tonu ma le faamaoni o le tuuina atu ai e le alii faasalalau o lagona ma manatu o isi sui faipule.
Na faaumiumi lava ona fefāloa’i lenei faatalanoaga i le va o i la’ua nei, ma oo ai ma ni faamatalaga taufaamata’u a le Minisita i le paketi o loo faatupe ai le leitio faavaomalo le RNZ.
Ma ua tali le ta’ita’i a le Labour, Chris Hipkins i le alii Palemia, e tatau ona ia tula’i mai e faia ni ta’iala e limata’ita’iina ai ana minisita mai le tula’i mai o nei faiga, i lona manatu e lē tatau lava ona tupu.
Mai le RNZ, poo le leitio faavaomalo a Niu Sila, sa sagatonu, atoatoa ma lelei le faatautaiga e Corin Dann o le faatalatalanoaga ma Winston Peters.
Puna o Faamatalaga: https://www.stuff.co.nz/politics/360663996/labour-calls-pm-step-after-winston-peters-rnz-threat
