Fai mai na faaitiitia mai i le 73 pasene le aofai o tamaiti sa oo atu i le a’oga i le aso mulimuli o le kuata tolu o le a’oga i le vaiaso talu ai, o lona uiga e 200 afe tamaiti e lei aooga i lea aso.
O faamaumauga aloa’ia ua faailoa ai e 744 afe tamaiti a’oga sa tatau ona iai i le a’oga i le Aso Faraile talu ai ae na o le 544 afe na aga’i atu, ae o le amataga o le vaiaso lava lea na te’a nei sa vaaia e oo atu i le 83 ma le 84 pasene le aofa’i o tamaiti na a’ooga ae faai’u ane le vaiaso ua pa’ū mai i le 73 pasene.
Ua faailoa i le lipoti a le televise tasi faamatalaga mai nisi mātua e moni sa lē a’ooga a latou fanau i le aso mulimuli lea o le a’oga ona o nisi e malaga mo tafaoga i le tuua o a’oga.
E lei leva atu nei ona faailoa e le Faigamalo e mana’omia le 94 pasene o tamaititi e a’ooga i aso ta’itasi o le vaiaso ina ia ausia ai le taula’iga o loo taula’i iai o le 80 pasene o tamaiti aga’i atu lava i a’oa’oga i kuata ta’itasi.
Fai mai le minisita lagolago o A’oga, David Seymour o lea e sa’ili e le malo se suiga i amioga faatatau i le alu i le a’oga, ma e lē mafai e le malo ona faamalosia le o o tamaiti i le a’oga ae o loo taumafai se faiga e vaai iai o se mea tatau le alu i le a’oga i aso uma.
Fai mai le minisita o le faiga fou na faato’ā faailoa talu ai nei le Star system e faamautinoa ai e silafia e a’oga, mātua ma tamaiti a’oga tulaga e oo iai pe a lē ausia faamoemoega.
Puna o Faamatalaga: https://www.1news.co.nz/2024/10/04/less-than-three-quarters-of-students-show-up-for-final-day-of-term/
