O folasaga faalauaitele a le atunuu i Niu Sila i le vaiaso nei e pei ona folasia ai finagalo i le tulafono taufaaofi o le toe faaaogā o le tulafono o le sitiseni Niu Sila o tagata Samoa na soifua mai i le va o le tausaga e 1924 ma le 1949, o loo auai lē sa avea ma Palemia o Samoa ua avea nei ma ta’ita’i o le Itu agai, le susuga Tuilaepa L Sailele Malielegaoi.
O lea faatasiga ua lipotia ai e le leitio a Niu Sila se finagalo o Tuilaepa na folasia i lea faatasiga sa ia saunoa ai e faapea, e faigofie le alu i seoli nai lo le malaga i Niu Sila.
Na saunoa ai foi le ta’ita’i o le Itu Agai e pei ona ta’ua lava i le lipoti a lea leitio, ma ia faailoa ai i le faatasiga sa ia faitau i le maliega a Niu Sila ma le Malo o Saina i le malaga atu o tagata Saina i Niu Sila e aunoa ma se Visa, ae a fua le faitau aofai o tagata Saina e 1.4 piliona ma tagata o Samoa o le matua faigata lava.
O loo iai le talitonuga o se taimi o le a faailoa ai se finagalo o le Malo o Samoa i le mataupu lenei, ona o loo tagofia le tulafono taufaaofi na faatū e se alii faipule o Niu Sila o se tagatanuu o le Atu Kuki, i tulaga faalotoifale e pei ona tuuina atu i se komiti faapalemene mo le tauaaoina o finagalo o tagata lautele a o lumanai ai le faitauga lona lua, lea ua lipotia poo le masina o Oketopa e faatino ai lea laasaga o le tulafono taufaaofi.
O le ta’ita’i o le Itu Agai o le Palemene o Samoa o le ta’ita’i foi o le vaega e puipuia aiātatau a tagata sa ia fofogaina le folasaga i luma o sui o le komiti faapalemene a Niu Sila, a o molimauina e le sui ta’ita’i o le Itu Agai ma le vaega e puipuia aiātatau a tagata le tofa Lauofo Fonotoe Piere Meredith ma le failautusi o le latou vaega faaupufai le tofa Lealailepule Rimoni Aiafi.
