O se alii e 31 tausaga le matua sa galue i se isi kamupani e latou te faatau atu ma kiliva i faleoloa pepa telefoni poo phone cards a le kamupani telefoni feavea’i ma fesootaiga televavave faaonapo nei le Digicel Samoa, ua faasala e le faamasinoga maualuga i le valu masina i le falepuipui, ina ua faamaonia lona faia o le solitulafono o le faaoolima matagā i se tamaitai sa galue i se faleoloa i Leulumoega tuai.

O le galuega a Toloa Semi Letoa o Palisi ma Samata-i-tai, o le tilivaina lea o card telefoni i faleoloa, ma o le mafuaaga lea o lona masani i le tamaitai na aafia.

O le foi mai i Apia o le galuega a lē ua faasalaina i le falepuipui mai Manono-uta na ia pikiina mai ai le tamaitai i le taeao, sa fia agai mai i lana galuega.

Ae na faaalia e leoleo, ina ua oo mai le taavale paepae SUV a le kamupani sa faaaogā e Toloa i lana galuega, na ia faatu i se vaega o le alatele lata i le malaevaalele i Faleolo ma ia faatino ai le solitulafono.

Na mafai ona alu ese lē na aafia ma le taavale ma ia alu ane loa faatu ni taavale se lua na agai ane i le taimi lea ma faailoa iai lona fia maua o se fesoasoani mai le gaioiga na faia ia te ia.

Na logo leoleo ma suesueina loa le tagi a le tamaitai ma tuuina atu ai le tetee a lē ua molia i moliaga a leoleo.

Ina ua mae’a ona valaau molimau a leoleo ma maua lē ua molia na lē faamaonia ai le tasi o moliaga, ae faamaonia na o le solitulafono o le faaoolima matagā poo le indecent assault.

O se lipoti na auina atu muamua sa iai se sasi i le ta’ua e faapea o lenei alii e faigaluega i le kamupani telefoni feavea’i a le Digicel, peitai o le fesiligia e le pulega o maketi a le Digicel o lea lipoti, ua faamanino ai lenei mataupu ina ua toe siaki le faai’uga tusitusia a le faamasinoga, e lē o se tagata faigaluega a le Digicel, o se isi kamupani sa galue ai, i le tufatufaina atu o pepa telefoni a le kamupani.

E faamalulu atu ai i le pulega o le kamupani a le Digicel mo le faaletonu i le uluai lipoti.