Ua i luma nei o le Kapeneta se fautuaga a le Komiti Faafoe o le poloketi tasi le miliona tala mo se toe iloiloga o aiaiga o vaegatupe o lea fuafuaga tau i le atina’e o le atunuu.
O se feiloa’iga ma le tamaitai minisita o le Matagaluega o Tina ma Tamaitai Atina’e o Afioaga ma Aga Fesoota’i o loo iai le vaaia o lea poloketi a le Malo, na fesiligia ai i le ta’otoga o iai le tausaga muamua o le poloketi, pe ono toe maua e itumalo ta’itasi le 800 afe tala o le miliona tala muamua ona sa na o le 200 afe tala na faamatuu i Fono Faavae a itumalo palota e 51.
Na faaalia e le Minisita le afioga Mulipola Anarosa Ale Molioo, e lē mafai ona talanoa faalauaitele i le fautuaga ua ave atu nei mo se iloiloga ma se finagalo o le Kapeneta.
I le faaaogāina e itumalo o a latou ta’i miliona lea ua faagasolo fuafuaga o le miliona tala lona lua, ua faailoa e le tamaitai Minisita e telē se lesona a le Komiti Faafoe mai le faaaogāina o le miliona muamua.
E mafua lea ona o mana’oga o itumalo ia latou atina’e ma le faamuamua sa ave e komiti o Fono Faavae i le faaaogāina o vaegatupe.
Le Minisita o le Matagaluega o Tina ma Tamaitai Atina’e o Afioaga ma Aga Fesoota’i o loo iai le vaaia o le poloketi tasi le miliona tala, afioga Mulipola Anarosa Ale Molioo.
