Ua amata savali lenei masina fou o Aperila lea ua faailoa e le Komesina o le ofisa o le komisi o faigapalota le afioga Tuiafelolo A John Stanley, ua amata ai le galuega a lona ofisa o le toe lesitalaina uma o tagata palota i le atunuu.

O se galuega o loo manaomia ai le lagolago ma le galulue faatasi o le atunuu e ala i le tapenaina lelei o nisi o vaega tāua e manaomia mo lea galuega tele.

O ia vaega e aofia ai pepa fanau, tusi folau ma pepa faamaonia e pei o ID o le NPF, laisene avetaavale, pepa faamaonia poo le ID o i latou ua aulia tausaga o le faamanuiaga tau penisione, pepa faamaonia o le suafa matai ma le pepa faamaonia o le fanua e faasino ia i latou o loo alala i eleele poo fanua umia saoloto le freehold land.

O taualumaga a le Palemene talu ai nei na pasia ai teuteuga o le tulafono autu o faigapalota ma avanoa ai le lesitala o tagata uma i luga o upega tafailagi lea ua agavaa ai foi ma o tatou tagatanuu o loo alala i fafo.

O i latou foi i fafo e lesitala e tatau ona malaga mai i Samoa mo le pueina o ata ma pue tulagalima poo finger prints.

E lē faaaogāina se lesitala o se tagata palota mai fafo i le tuuina lea i totonu o se lola palota pe a lē susū mai i Samoa e pue ma faamau ai ona tulagalima ma pue ai foi ma lona ata.